🔴 Streaming: Muralla RC vs CDU Zaragoza

Fase de Ascenso á Liga Iberdrola | Xornada 3 | 28 abril, 16:00 horas
En directo dende o Estadio Gregorio Pérez Rivera, Lugo
Nos comentarios: Óscar Poy e Miguel Anxo García.

Advertisements

O equipo feminino recibe mañá a CDU Zaragoza na fase de ascenso

O equipo feminino recibe mañá a CDU Zaragoza na fase de ascenso

O equipo feminino do Muralla recibe mañá no Gregorio Pérez Rivera a CDU Zaragoza na terceira e derradeira xornada da fase de liguiña nos play-offs de ascenso a Liga Iberdrola. Ambos equipos, sen posibilidades para pasar a semifinais intentarán acadar a vitoria nun encontro que se presenta a priori máis igualado que os dous anteriores ante La Única e GEiEG, dous rivais de gran entidade que se xogarán nesta xornada o primeiro posto no Grupo Norte.

Para o encontro o adestrador Edgardo Martínez deberá superar o ‘handicap’ da ausencia de tres importantes xogadoras, Maitane Buján, Jessica Martín e Judith Hernández, que foron convocadas coa selección de Galicia de Seven para disputar nesta fin de semana o Campionato de España en Cullera, Valencia.

Foto: Mairaphotosport

As mulleres do Muralla intentarán rematar esta Fase de Ascenso con bo sabor de boca ofrecendo á afección do clube a vitoria.

O encontro terá lugar mañá sábado ás 16:00 horas no escenario habitual do Estadio G. Pérez Rivera e será dirixido polo Sr. Noriega (Asturias).

Xornada de adestramento e portas abertas en Rábade

A Escola de Rugby do Muralla RC celebrará mañá un adestramento e xornada de portas abertas no Campo Municipal de Rábade a partir das 11:00 horas. Aos máis de 60 nenos e nenas da Escola, que abrangue as categorías dende Sub-6 ata Sub-12, uniranse tamén unha representación de CR Fendetestas de As Pontes.

A xornada tamén servirá para achegar aos nenos e nenas de Rábade e a súa contorna o deporte do rugby e complementará as visitas e adestramentos de promoción que se veñen celebrando durante toda a tempada nos centros escolares de dita vila e concellos limítrofes como Outeiro de Rei. Despois da xornada, que conta coa colaboración do Concello de Rábade, todos estarán convidados a un xantar no propio campo.

Fase de Ascenso: GEiEG vs Muralla RC

O equipo feminino do Muralla RC viaxa este sábado a Girona na segunda xornada da fase de ascenso para enfrontarse nun complicado partido ao potente GEiEG, un dos principais favoritos ao ascenso.

Logo da derrota na primeira xornada diante de La Única RT, as campioas da Liga Vasca, nesta segunda o reto aínda é maior, xa que as campioas catalás da Liga Kopparberg teñen un conxunto moi potente, vencendo con autoridade nunha competición de gran nivel.

O encontro valerá, como o anterior para gañar experiencia e medirse a rivais de maior entidade nunha fase de ascenso que o Muralla afronta como o comezo do camiño de preparación de cara a vindeira tempada na que hai a posibilidade da creación dunha División de Honor B para a que o Muralla estaría clasificado como campioas da Liga Galega.

FOTO: Mairaphotosport

GEiEG amosouse intratable na primeira xornada, varrendo do campo a CDU Zaragoza cun resultado de 0-87, o que amosa á clara a superioridade de GEiEG, superioridade tamén respaldada a nivel de entidade xa que é un clube histórico fundado en 1919 con 23 seccións deportivas e nada máis e nada menos que 16.500 socios, sendo creada a sección de rugby no ano 1971.

O encontro terá lugar mañá sábado ás 16:30 horas no campo de rugby de Palau Sacosta de Girona.

············

Fase de Ascenso á Liga Iberdrola, xornada 2:

S21, 16:30 h | GEiEG vs Muralla RC
D22, 10:30 h | CR El Salvador vs Les Abelles RC
D22, 12:00 h | La Única RT vs CD Universidad Zaragoza
D22, 12:30 h | Universitario Sevilla CR vs AD Ingenieros Industriales

O Muralla caeu ante un La Única superior

O equipo feminino do Muralla caeu derrotado na primeira xornada da Fase de Ascenso ante un equipo de La Única RT superior as lucenses, aínda que non tanto como reflectíu o marcador ao final dos oitenta minutos.

No primeiro tempo La Única acadaba vantaxe cun guión moi similar en todos os ensaios, superando a defensa do Muralla na banda con potencia e velocidade ou por superioridade numérica logo de agrupar a unha defensa rival que non era quen de reequilibrar a súa liña defensiva.

Aínda que no marcador as visitantes se despegaban no campo non se reflectía tanto dita superiodade, con fases nesta primeira parte nas que incluso o Muralla dominou territorialmente ás navarras. Pero a superioridade de La Única cunha liña máis incisiva en ataque era clara, mentres que en dianteira as mulleres adestradas por Edgardo Martínez daban a cara, dominando as touches e as melés pero perdendo a posesión en moitos rucks chegándose ao descanso co marcador de 10-28 con dous ensaios do Muralla por medio de Corrales e de Janeiro.

No segundo tempo o guión repetíase nos ensaios  das visitantes, o Muralla non tiraba a toalla e seguía loitando. Unha expulsión temporal de Vero Marí deixaba 10 minutos ao Muralla cunha muller menos aínda que lograban aproximarse en varias ocasións á liña de ensaio rival pero sen acadar o froito desexando mentres que a efectividade de La Única deixaba as claras a superioridade do conxunto visitante que deixaba o marcador en 10-45 ao final do partido.

No outro partido do Grupo Norte GEiEG non tivo piedade con CDU Zaragoza endosándolle un 0-87 que deixa claro que as catalás son unhas das favoritas de cara o ascenso. Complicada visita polo tanto para o Muralla o vindeiro sábado ás 16:30 horas no que viaxa a Girona para enfrontarse a GEiEG na segunda xornada.

······························

MURALLA RC 10 (10): Paula Ben (Lili Manrique ’78), Coro Repullés, Mariona Bordas (Ángela de la Orden ’76); Carmen Janeiro, Taylor Grzywacz; Alba Mur (Daniela Hernández ’66), Marta Castro (Valle Viñas ’40), Judith Hernández; María Veiga (C), Raquel Fernández; Iris Vega (Jone Cornejo ’66), Vero Marí, Lucía Corrales, Jessica Martín; Chelsea Neukum (Maitane Buján ’41).

– Ensaios: Corrales, Janeiro.
– Sin bin: Marí.

LA ÚNICA RT 45 (28): Ana Sospedra, Haizea Donamaria (Ivet Frances ’77), Clara Liso (Ane Zabalza ’44); Haize Goñi, Nahia Jiménez; Ixiar Braco (Ekhiñe Armendia ’74), Miren Irigoyen, Irene Ruíz de Erenchun; Ainhoa Díaz (C) (Maialen Marturet ’77), Arantxa Ursua; Tecla Masoko (Laura López ’77), Irene Reyes (Leire Rodríguez ’66), Ana Mariñelarena, Maddi Braco (Victoria Allo ’70); Noelia Telletxea.

– Ensaios: Irigoyen (2), Mariñelarena (2), M. Bracco, Masoko, Allo.

– Transformacións: Ursua (5).

Resultados dos sorteos na festa de onte

Dende o Muralla RC queremos agradecer a todos as empresas e establecementos que colaboraron nos sorteos da festa de onte o seu apoio ao noso equipo feminino! Mil grazas a eles e a vós aos que asististes á festa! Grazas tamén á imprenta Unicopia pola impresión dos talonarios.

Deixámosvos aquí os números premiados nos sorteos, se o número da túa papeleta figura entre algún destes e aínda non recolliches o teu agasallo, ponte en contacto connosco:

1) Camiseta MRC (Sopa De Nuez): Nº 612

2) Camiseta MRC (Sopa De Nuez): Nº 174 (Entregado)

3) Chocolate e churros 2 persoas (Cafeteria San Marcos): Nº 378

4) Caldeiro 6 cervexas e ración de raxo (La Taperia De Baco): Nº 663 (Entregado)

5) Cea 2 persoas por valor de 40€ (Jarabicha Cantina): Nº 932

6) Cea 2 persoas por valor de 40€ (A Caseta DA BARRA): Nº 962

7) Cea 2 persoas por valor de 25€ (La cosechera eventos): Nº 215

8) Tarxeta agasallo de 10€ (Decathlon Lugo): Nº 814

9) Tarxeta agasallo de 10€ (Decathlon Lugo): Nº 312

10) Tarxeta agasallo de 10€ (Decathlon Lugo): Nº 255 (Entregado)

11) Tarxeta agasallo de 10€ (Decathlon Lugo): Nº 582 (Entregado)

12) Balón rugby Kipsta (Decathlon Lugo): Nº 627

13) Balón rugby Kipsta (Decathlon Lugo): Nº 523

14) Balón rugby Kipsta (Decathlon Lugo): Nº 655

15) Balón rugby Kipsta (Decathlon Lugo): Nº 519

O equipo feminino comeza este domingo a súa andaina na Fase de Ascenso

O equipo feminino disputará este domingo o seu primeiro encontro da oficialmente chamada División de Honor B que ven sendo a Fase de Ascenso á Liga Iberdrola DH, a máxima categoría do rugby feminino estatal, recibindo no Estadio Gregorio Pérez Rivera ao equipo navarro de La Única Rugby Taldea campioas da Liga Vasca de Rugby.

As mulleres adestradas por Edgardo Martínez, logo de proclamarse brillantemente gañadoras da Liga Galega clasificáronse automaticamente para disputar esta fase de ascenso, fase de ascenso da que sairá un equipo gañador que ascenderá directamente á Liga Iberdrola e un subcampión que disputará un play-off ante o penúltimo equipo clasificado de dita liga.

O formato da competición consiste en dous grupos Norte e Sur composto cada un por 4 equipos que xogan unha liguiña a unha volta, clasificándose para as semifinais os 2 primeiros de cada grupo. O Muralla quedou encadrado con GEiEG (Girona), La Única RT (Pamplona) e CDU Zaragoza, recibindo a La Única esta fin de semana, a CDU Zaragoza o día 28 e viaxando a Girona o 21.

O equipo máis potente do grupo é o das catalás de GEiEG, dunha liga de moito nivel e que parten como favoritas para rematar no primeiro posto do grupo. La Única, campioas tamén dunha liga forte como é a de Euskadi chegan a Lugo algo máis xustas de efectivos pero tamén como claras favoritas para levar a vitoria polo que o Muralla deberá empregarse a fondo especialmente en defensa para intentar sacar un resultado positivo.

Máis igualado se presentará a priori o choque ante CDU Zaragoza nunha fase de ascenso á que o Muralla chega sen presión e co obxectivo de gañar experiencia e medir o seu nivel ante rivais diferentes de cara á posible creación na vindeira tempada dunha ‘auténtica’ categoría de prata para a que estarían clasificadas para xogar as mulleres do Muralla como campioas da LGR Feminina.

O encontro terá lugar este domingo 15 de abril ás 11:30 horas no Estadio G. Pérez Rivera e estará dirixido polo Sr. Belarmino Álvarez.

Fin de semana decisiva para o Muralla

Final LGR Feminina: Muralla RC vs CR Lalín

Lugo acolle mañá a final da Liga Galega Feminina de Rugby na que o Muralla intentará acadar o título de liga fronte do seu principal rival nesta tempada, CR Lalín, un equipo nunca doado e que tentará de augarlle a festa ao Muralla nunha final na que ademais de obter o título ligueiro o clube campión clasificarase para disputar a fase de ascenso á Liga Iberdrola, a primeira división do rugby feminino estatal.

De lograr o título suporía o segundo para o equipo feminino do Muralla, o anterior acadado na tempada 2015-16 o que amosa a progresión en pouco tempo dunha escadra formada tan só en 2013.

As mulleres adestradas por Edgardo Martínez logo de rematar a liga regular imbatidas buscarán porlle a guinda á liga cunha nova vitoria no día de mañá no Gregorio Pérez Rivera diante das Abellonas que acudirán a Lugo mermadas polas baixas. A pesar delo as do Deza son un equipo moi loitador polo que o Muralla deberá saír concentrado xa que nunha final a un partido todo pode acontecer.

Como precedente, nos dous enfrontamentos na liga regular o Muralla resultou vencedor aínda que foron partidos moi igualados nos que as lucenses tiveron que aplicarse a fondo na segundas partes para acadar a vitoria.

A final terá lugar mañá, sábado 17 de marzo ás 17:00 horas no Estadio Gregorio Pérez Rivera.

A cuestión da División de Honor B

Aínda que non é oficial aínda, cabe a posibilidade de que na vindeira tempada se cree unha nova división intermedia entre a Liga Iberdrola e as ligas rexionais, e barállase que os equipos campións de cada liga rexional pasen a formar parte desa nova ‘segunda división’ do rugby español feminino polo que se finalmente se materializa a creación desa liga o campión da Liga Galega disputaría a vindeira tempada a División de Honor B.

O que si é seguro é que o campión disputará no mes de abril e maio a fase de ascenso á Liga Iberdrola, nunha dura competición nunha primeira fase de liguiña e unha segunda de eliminatorias das que sairá un equipo que ascendería directo e un subcampión que disputaría un play-off ante o penúltimo equipo da Liga Iberdrola.

Nesta fase de ascenso o Muralla de resultar campión da Liga Galega xogaría encadrado no seu grupo cos clubes campións de Aragón, Euskadi e Cataluña.

Semifinal LGR Segunda División: CR Fendetestas vs Muralla RC

O equipo masculino do Muralla RC disputa este domingo en As Pontes unha das semifinais da Segunda División da Liga Galega de Rugby a partido único diante de CR Fendetestas, partido que fora aprazado na pasada fin de semana por mor do temporal.

O gañador do partido xogará a final da liga diante de CD Zalaeta, vencedor da outra eliminatoria que os enfrontou a Santiago RC por un axustado marcador de 8-3.

O Muralla logo de clasificarse in extremis no cuarto posto para os play-offs xogarase o pase á final diante do equipo que rematou na primeira posición a liga regular, Fendetestas, que parten como claros favoritos para o partido ao xogar como locais, e logo de rematar a liga regular con só un partido perdido e vencer na liga ao Muralla en Lugo e As Pontes.

Os homes adestrados por Alfredo Pintor chegan as semifinais logo de sufrir moito durante toda a liga na que a constante foi a irregularidade por mor do curto plantel de xogadores e as baixas coas que afrontaron todos e cada un dos partidos. Aínda así tentarán dar a sorpresa en As Pontes nunha semifinal a partido único que se prevé dura e que sen dúbida será disputada.

Como premio, o gañador accederá á final da LGR Segunda División, final na que se dilucidará quen é o campión da tempada 2017-18 o cal ascenderá directamente á Primeira División galega. O subcampión terá unha segunda oportunidade de ascender no mes de abril diante de CR Lalín de primeira, no play-off de permanencia da LGR1.

O encontro terá lugar este domingo ás 12:30 horas no Campo de Rugby Monte Medulio de As Pontes.

Concentración de Rugby Base de Compostela

As actividades do clube na fin de semana complétanse coa Concentración de Rugby Base de Compostela, organizada por Santiago RC, e a que acudirá a Escola de Rugby do Muralla RC que a Compostela a 41 nenos e nenas de categorías Sub-6, Sub-8, Sub-10 e Sub-12.

O torneo terá lugar na mañá do sábado no Estadio de Santa Isabel da capital galega.

Na xornada do sábado tamén haberá participación de dous xogadores do Muralla, Julio Ortiz e Manuel Pizarro coa selección Sub-14 de Galicia nun partido diante de Castilla-y-León en Ponferrada.